Zamanaýı zaýyt óndirisi negizinde polıgonda ınertti qaýipsiz jáne bıoirigish materıaldar kómiletin bolady.
Qala ákimdiginiń Baspasóz qyzmetiniń málimeti boıynsha, kásiporynda qaıta óńdeý úshin 50 myń tonnaǵa deıin karton, sellofan, áınek, plastıka, metall sııaqty zattar suryptalady. Bolashaqta keshen janynan shıkizattardy ekinshi qaıtara tereń óńdeý úshin qosymsha qýattardy jasaý josparlanǵan. Osynyń barlyǵy jáne qaldyqtardy óńdeýdi basqarýdyń keshendi júıesin engizý qalany qorshaǵan ortaǵa túsetin ekologııalyq júktemeni azaıtýǵa oıdaǵydaı yqpal etedi.
Megapolıs ákimi Baýyrjan Baıbek mundaı mańyzdy keshendi iske qosý tek qala úshin ǵana emes, jalpy elimiz úshin eleýli oqıǵa ekenine toqtalyp, «Memleket basshysy jańa tehnologııalardy engize otyryp kásiporyndardyń tıimdiligin ǵana emes, sonymen qatar ekologııalyq jaǵdaıyn jaqsartý qajettigin turaqty nazarda ustaýda jáne elimizde qabyldanǵan sıfrlandyrý baǵdarlamasy da osy baǵytta júzege asýda. Bul keshen – ozyq tehnologııanyń úlgisi ári 2017 jylǵy EHSRO-nyń negizgi muralarynyń biri. Joba memlekettik-jeke áriptestik qaǵıda boıynsha qolǵa alynǵan, 5,4 mlrd. teńgege ınvestormen 25 jylǵa kelisim jasaldy, al qala óz kezeginde jer bólip, barlyq ınjenerlik kommýnıkasııalardy júrgizdi», - dep atap ótti.
Mundaǵy 3,9 gektar aýmaqqa ákimshilik ǵımarat, Ulybrıtanııada jasalǵan arnaıy tehnıkalyq garaj jáne ozyq ıtalıandyq qondyrǵylarmen jabdyqtalǵan negizgi óńdeý bólmeleri ornalasqan. Kásiporynda 530 turaqty jumys orny bar.
«Tártip» AQ-nyń basqarma tóraǵasy Aıbek Rahımov qala ákimshiligi men jeke ınvestorlar konsorsıýmy arasynda uzaq merzimge jasalǵan kelisim kásiporynnyń barynsha tıimdi jumys atqaratynynyń ozyq modeli bolatyndyǵyn aıtty. Qazirgi kezde «Tártip» AQ TQQ-dyń 70%-yn qamtıdy. Kompanııa balansynda 236 tehnıka birligi bar, qoqys tasymaldaıtyn barlyq kólikterde GPS júıesi jumys isteıdi, planshetter arqyly qoqys alańyndaǵy jaǵdaılar túgel kórinedi. Uzaq merzimdi kelisimniń negizgi tarmaqtarynyń biri avtoparkti únemi jańartý jáne jumys prosessin avtomattandyrý bolyp tabylady. Qazirdiń ózinde Evro-4 standartynyń 30 mashınasy satyp alynyp, baǵyttardy dıspetcherleý júıesi engizildi.
Al «Green recycle» JShS dırektory Dmıtrıı Danılchenko «Elimizde iske asyp jatqan oń ózgeristerge jáne jeke kompanııalar konsorsıýmy men qala ákimdiginiń birigip jasaǵan kelisimniń arqasynda biz óte qysqa merzimde, ıaǵnı joba maketi talqylanǵan bir jyl ishinde mańyzdy keshendi iske qostyq. Kásiporynnyń basty maqsaty – bolashaqta qorshaǵan ortaǵa túsetin júktemeni azaıtý. Biz bul keshenniń ózgelerge, sonyń ishinde kórshi elderge úlgi bolatyndyǵyna senimdimiz, olar úlken qyzyǵýshylyq tanytýda, óńirdiń odan ári órkendeýi úshin damýdy jalǵastyra beremiz», - dep atap ótti.
Elvıra Serikqyzy,
«Egemen qazaqstan»
ALMATY
